Bankdan müştərilərin pulunu çıxarmaqda ittiham olunan "Bank Standard" əməkdaşları - İlyas İlyaszadə, Səid Rəhimov, Anar Abdullayev və Ruslan Əliyevin məhkəməsi başa çatıb. Təqsirləndirilən şəxslər Ağır Cinayətlərə Dair İşlər üzrə Məhkəmədə mühakimə ediliblər.
Təqsirləndirilən şəxslər CM 271.2.1-ci və 271.2.3-cü, (mütəşəkkil dəstə tərəfindən kompüter informasiyasına qanunsuz daxil olma ilə külli miqdarda ziyan vurma), 177.3.1-ci və 177.3.2-ci (mütəşəkkil dəstə tərəfindən özgənin əmlakını külli miqdarda ziyan vurmaqla gizli olaraq talama) maddələri ilə ittiham olunublar.
İttihama görə, təqsirləndirilən şəxslər kompüter informasiyasına qanunsuz daxil olub "Bank Standard" müştərilərinin bank hesablarındakı pul vəsaitlərini talamaqla məşğul olublar.
Mütəşəkkil dəstə üzvləri həmin informasiyalar vasitəsilə ayrı-ayrı fiziki şəxslərə məxsus elektron bank hesablarından böyük məbləğdə pul çıxarıblar və onların mənafeyinə külli miqdarda ziyan vurmaqla həmin pul vəsaitini gizli olaraq talayıblar. Müəyyən edilib ki, Nikolay Albertoviç ötən ilin noyabrında Çin Xalq Respublikasına gedib və kommersiya məqsədilə məişət əşyaları alıb. O, həmin əşyaların pulunu ödəmək üçün "Bank Standard"dan kart vasitəsilə pul çıxarmaq istəsə də, hesabında pulu olmayıb. O, aldığı malları saxlanc yerlərinə yığıb və məsələ ilə bağlı bankla əlaqə saxlayıb. Bankdan ona bildiriblər ki, hesabında olan pul çıxarılıb. Bundan başqa, təqsirləndirilən şəxslər daha bir neçə müştərinin pulunu eyni qaydada bankdan çıxararaq mənimsəyiblər. Bundan başqa, cinayət işi üzrə 10-dan çox zərərçəkmişin adı qeyd olunur ki, həmin müştərilərin də pulları eyni qaydada mənimsənilib.
Canilər saxta plastik kartlardan istifadə etmişlər. Ötən il noyabrın sonunda MTN əməkdaşlarının keçirdiyi əməliyyat tədbirləri nəticəsində dəstə üzvləri tutularaq məsuliyyətə cəlb ediliblər.
Məhkəmənin hökmü ilə İlyas İlyaszadə, Səid Rəhimov, Ruslan Əliyev 6 il 6 ay, Anar Abdullayev isə 4 il müddətinə azadlıqdan məhrum edildilər.
|
