Ədəbi çevrələrdə yaxşı tanınan şair Rəfail İncəyurd 55 yaşını qeyd etdi. Onun şeirlərini xoşlayanlar üçün ad günündə "15-imdən 55-ə varanda" adlı bir şeir toplusu da təqdim etdi. "Xarı bülbül" restoranının banket zalına toplaşanların sanbalı Rəfailin yaradıcılığına etimadın, hörmətin əlaməti kimi də qiymətləndirilə bilərdi. Axşamı ozan-aşıq müsabiqəsinin qalibi gənc Aşıq Avdı saz ifaları ilə süsləyirdi.

Rəfail İncəyurd təhsili etibarilə riyaziyyatçıdır, BDU mexanika-riyaziyyat fakültəsini bitirib, bununla bərabər, 15 yaşından şeir yazır və poeziyaya bu həvəs onu heç vaxt tərk etməyib. Tələbəlik illərindən ədəbi dərnəklərdə iştirak edib, sənətdə öz sözünü deməyə çalışıb. Daha sonralar Bakı nəşriyyatlarında və qəzetlərdə çalışıb. "Ömürdən o yana yollar görünür", "Köhnə kişilər", "Köz yaşı" kimi şeir toplularını nəşr etdirib.

Xalq şairi Zəlimxan Yaqub, akademik Teymur Bünyadov, millət vəkili Nizami Cəfərov şairin yaradıcılığı haqqında xoş sözlər söylədilər. Bu son kitabına daxil etdiyi seçmələrdən də göründüyü kimi, obrazlı söz deməyi bacarır, şeirlərində haydan-küydən çox uzaqdır və olduqca duyğuludur. Təsadüfi deyil ki, onun bir çox şeirlərini gənc aşıqlar sazda oxuyur, bəzi şeirlərinə isə mahnılar bəstələnmişdir və müğənnilərin repertuarında yer alır. Rəfail İncəyurd bizimlə söhbətində söylədi ki, ədəbi taleyinə ümidlə baxır.