Orta məktəb şagirdlərində siqaretə meyil artıb

Orta məktəb şagirdləri arasında siqaret çəkənlərin sayı artır. Azərbaycan Uşaqlar Birliyinin bununla bağlı azyaşlılar arasında keçirdiyi sorğu bu fikrin yaranmasına səbəb olub. Sorğu əsasən şəhər məktəblərini əhatə edib. Çünki ötən sorğularda şəhər məktəblərində təhsil alanların əksəriyyəti siqaret çəkdiyini bildirmişdi. Birliyin sədri Kəmalə Ağazadənin dediyinə görə, şəhər məktəblərində 8-11-ci sinif şagirdlərinin əksəriyyəti siqaretin dadına baxdığını etiraf edib: "Nəticələr gözlənilən kimi olub. Belə ki, 200 şagirdin əksəriyyəti 1 dəfə də olsa siqaret çəkdiyini deyib. Siqareti dəb kimi çəkənlər 50 faiz təşkil edib".

Sorğuda iştirak edən qızların 7 faizi siqaret çəkir. 10-11-ci sinif şagirdləri siqareti müəllim və valideynlərdən xəbərsiz çəkdiklərini bildiriblər. "Siqaretin sağlamlığınıza təsiri" sualını cavablandıran yeniyetmələr tütün məmulatlarının sağlamlığa təsirini bilirlər. Maraqlıdır ki, uşaqlar "böyüklər də bilə-bilə siqaret çəkirlər" deyə əməllərinə haqq qazandırmağa çalışıblar.

Söhbət əsnasında öyrəndik ki, küçə uşaqları üçün reabilitasiya və reinteqrasiya mərkəzi fəaliyyətə başlayıb. Mərkəz uşaqlara psixoloji yardım göstərməklə ailələrinə qaytarmağa kömək göstərir. Azərbaycan Uşaqlar Birliyinin sədrinin dediyinə görə, uşaq inspektorlarının köməyilə uşaqların valideynlərinin olub-olmadığı, ailələrin durumu araşdırılır: "Uşaqlar əksər hallarda Hüquq Klinikasına göndərilirlər. Bundan sonra onların ailələrə qayıtmalarına yardım göstərilir".

Uşaqların yenidən küçələrə qayıtmamaları üçün azyaşlılar reabilitasiyaya cəlb edilir. QHT-lər birgə əməkdaşlıqla küçə uşaqlarının problemlərinin həllinə nail olacaqlarını düşünür. Sentyabrda mərkəzin fəaliyyəti nəticəsində neçə uşağın ailəyə qaytarıldığı haqda məlumat veriləcək: "Əsas iş uşağın yenidən küçəyə qayıdıb-qayıtmadığını araşdırmaqdır".