Bütün dünyanın "donuz qripi"ndən danışdığı bu günlərdə sağlamlıq üçün başqa təhdidlər də var. Əgər türk telekanallarını izləsək, bu ölkənin bizə yaxın vilayətlərində gənə sancmasından ölənlər və xəstəxanaya qoyulanlar barədə vaxtaşırı xəbərlər izləməli oluruq. Bu zəhərli gənə növü Azərbaycanda hələ qeydə alınmayıb, lakin bu isti aylarda əqrəb və ilan sancmalarının sayının xeyli artdığı bəlli olmuşdur. Hörümçək-qaraqurd sancmaları da qeydə alınmışdır.
Cari il aprelin sonlarından indiyədək Kliniki Tibbi Mərkəzin toksikologiya şöbəsinə ilan sancması nəticəsində 38 nəfər müraciət edib, onlardan birinin həyatını xilas etmək mümkün olmayıb. Bu barədə "Turan" agentliyinin həmin şöbənin müdiri Azər Maqsudova istinadən verdiyi xəbərdə deyilir.
Azər Maqsudov bildirir ki, ilan sancması ilə xəstələr klinikaya əsasən Abşeron, Masallı, Lənkəran, Bərdə və Yevlax rayonlarından gətirilib. Təhlükə təşkil edən gürzə ilanlarıdır. Bundan başqa, toksikologiya şöbəsinə əqrəb sancması ilə 9 xəstə daxil olub, onların 6-nın vəziyyəti ağır olub, amma heç biri ölümlə nəticələnməyib. Həkim bildirib ki, hörümçək-qaraqurd sancmasından bir qədər az insan zərər çəkib. 6 belə xəstənin hamısının vəziyyəti ağır olub, amma yenə də ölüm olmayıb. Əqrəb və hörümçək sancmış xəstələr Abşeron və Qobustan rayonlarından gəliblər.
Arı sancmasına allergik reaksiyası olan xəstələr də burada müalicə olunur. Azər Maqsudov bütün dincələnlərə təbiətdə, xüsusən meşə gəzintilərində diqqətli olmağı, gənələrdən qorunmağı tövsiyə edir.
Azər Maqsudov medikamentoz zəhərlənmələrin statistikasını da açıqlayıb: cari ilin 6 ayı ərzində 136 hal qeydə alınıb, xəstələrdən 2-si dünyasını dəyişib. Əsasən, medikamentoz zəhərlənmələr narkotikin artıq dozada qəbulundan baş verib.
Sirkə turşusundan (essensiya) zəhərlənmə 48 xəstədən 2-nin ölümünə səbəb olub. Belə zəhərlənmələr əsasən məişət münaqişələri zəminində baş verir. Qış aylarında dəm qazından 73 zəhərlənmə halı qeydə alınıb, onlardan biri ölümlə nəticələnib.
Alkoqoldan zəhərlənmələrə gəlincə, toksikologiya şöbəsinə bu diaqnozla 54 xəstə daxil olub. Benzol, kerosin və asetonla zəhərlənmədən 8 xəstə gətirilib, ölüm halları qeydə alınmayıb.
|
