Cəmiyyət - Ayna.az

Azərbaycan Jurnalistlər Birliyinin Cənub bölgəsində fəaliyyət göstərən Media Hüquq Mərkəzi Lənkəranda region jurnalistləri üçün "İnformasiya əldə etmək huququ və informasiya sorğusunun hazırlanması" movzusunda seminar keçirib. Qeyd edək ki, Media Huquq Mərkəzi Prezident Yanında QHT-lərə Dövlət Dəstəyi Şurasının yardımı ilə həyata keçirilən "Cənub bölgəsində fəaliyyət göstərən jurnalistlərin huquqi maarifləndirilməsi" layihəsi çərçivəsində fəaliyyət göstərir.

Layihənin koordinatoru Xaqani İbadov bildirib ki, bölgələrdə icra stukturlarından informasiya əldə etməkdə ciddi problemlər var. Bundan başqa, yerli jurnalistlərin əksər hissəsinin məlumat əldə etməklə bağlı huquqi bilgiləri azdır və bunun nəticəsində problemlərlə üzləşirlər. İctimai əhəmiyyətli informasiyalara çıxış imkanlarının məhdudluğu üzündən regionda nəşr olunan qəzetlərdə birbaşa mənbədən alınan məlumatlar xeyli kasaddır və əksər qəzetlərdə bu öz əksini tapır.

Müstəqil hüquqşünas Rahim Seyfullayev jurnalistlərin informasiya əldə etməklə bağlı huquqlarından danışıb və muvafiq qanunvericilikdə əks olunmuş maddələri şərh edib. "Cənub bölgəsində jurnalistlərin hüquqi maarifləndirilməsi" layihəsinin eksperti Tərəfsiz Jurnalistlər (Parlament Jurnalistləri) Birliyinin sədri Elşad Eyvazlı bölgə mətbuatının məlumat əldə etmə ilə bağlı maarifləndirmə tədbirlərinə ehtiyac olduğunu deyib. Onun sözlərinə görə, hazırkı şəraitdə informasiya əldə etmək daha çox jurnalistin şəxsi bacarıq və imkanlarının ümidinə qalıb. Müvafiq icra strukturlarından informasiya əldə etmək üçün hüquqi bazanın zəruri olduğunu vurğulayan E.Eyvazlı yerli dövlət idarələrini bununla bağlı məlumatlandırmağa ehtiyac olduğunu deyir.

Tədbirdə iştirak edən yerli jurnalistlər məsələ ilə bağlı öz fikirlərini açıqlayıb təkliflərini verdilər. Media Hüquq Mərkəzində informasiya sorğularının cavablandırılmasının araşdırılması üçün monitorinq qrupunun yaradılması təklif edildi. Seminarda Prezident Yanında QHT-lərə Dövlət Dəstəyi Şurasının nümayəndəsi Mirzə Zahidov iştirak edirdi.