 |
çap et |  |
|
|||
Dünən Hərbi Prokurorluqda hərbi prokuror Xanlar Vəliyevin sədrliyi ilə kollegiya keçirilib. Kollegiyada ərazi hərbi prokurorluqlarında keçirilən əməliyyat müşavirələrinin nəticələri müzakirə olunub, tabe prokurorluqların əməkdaşları tərəfindən qaldırılan və işin səmərəliliyinə mənfi təsir göstərən problemlərin aradan qaldırılması, işin səmərəliliyinin artırılması baxımından həlli vacib məsələlərin tənzimlənməsi istiqamətində qarşıda duran vəzifələr müəyyənləşdirilib.
Kollegiyada çıxış edən Xanlar Vəliyev deyib ki, əvvəlki hesabat dövrü ilə müqayisədə 2009-cu ilin birinci yarısında qeydə alınan tabelik qaydası əleyhinə olan cinayətlər, o cümlədən hərbi xidmətdən yayınma, hərbi hissəni və ya xidmət yerini özbaşına tərketmə cinayətləri, fərarilik, habelə qeyri-hərbi cinayətlərin sayı əhəmiyyətli dərəcədə azalıb: "Qeydə alınan cinayətlərin 98,6 faizi açılıb. Törədilən bir sıra ağır və xüsusilə ağır cinayətlərin açılması təmin olunub. Bütövlükdə respublikanın hərbi birləşmələrində törədilən cinayət hadisələri, xüsusilə hərbi xidmətdən yayınma, o cümlədən fararilik cinayətləri, özünü öldürmə dərəcəsinə çatdırma və başqa cinayətlər əhəmiyyətli şəkildə azalsa da, qəsdən adam öldürmə və tabeçilik münasibətləri olmayan hərbi qulluqçular arasında qarşılıqlı münasibətlərin nizamnamə qaydalarını pozma cinayətləri artıb. Silahlı Qüvvələrdə bu növ cinayətlərin qarşısının alınması üçün müvafiq tədbirlər görülür. Bu sahədə istər qanunla nəzərdə tutulan tədbirlərin, istərsə də profilaktik məqsədlə təbliğatın səmərəliliyi və intensivliyi artırılmalı, müsbət nəticələr əldə olunması təmin olunmalıdır". Kollegiyada qeyd olunub ki, hərbi prokurorluq orqanları tərəfindən cinayətlər nəticəsində vurulan maddi ziyanın 95,4 faizinin istintaq zamanı ödənməsi təmin edilib ki, bu da 2008-ci illə müqayisədə 37,6 faiz çoxdur: "2009-cu ilin birinci yarısında Hərbi Prokurorluq orqanlarında vətəndaşların 969 müraciəti baxılaraq müsbət həllini tapıb, 271 vətəndaş müxtəlif məsələlərlə bağlı qəbul edilib. Hərbi hissə və birləşmələrdə 245 nəfər qəbul edilərək müraciətləri üzrə müvafiq qərarlar qəbul edilməsi təmin edilib". Xanlar Vəliyev bildirmişdir ki, Xocalı, Qaradağlı, Meşəli, Bağanis-Ayrım faciəsi, terror, habelə əsir düşmüş şəxslərə işgəncə verilməsi və erməni silahlı qüvvələrinin törətdikləri digər cinayət əməlləri Cinayət Məcəlləsinin soyqırıma görə məsuliyyəti nəzərdə tutan maddələrinə tövsif edilib. Kollegiyada qeyd olunub ki, sözügedən faktlarla bağlı cinayət işi Azərbaycan Respublikası Cinayət Məcəlləsinin soyqırımına görə məsuliyyəti nəzərdə tutan 103-cü və digər maddələri üzrə araşdırılır. Hərbi prokuror onu da əlavə edib ki, cinayət işi üzrə 282 təqsirləndirilən şəxs barəsində axtarış elan edilib. Hazırda cinayət işi üzrə intensiv istintaq-əməliyyat tədbirləri davam etdirilir. Daha sonra kollegiyada məlumat verildi ki, bu ilin altı ayı ərzində Hərbi Prokurorluğun bir işçisi prokurorluq orqanlarından xaric olunub, beş işçi isə intizam məsuliyyətinə cəlb edilib. İclasda o da qeyd olunub ki, bu ilin altı ayı ərzində xidməti fəaliyyətində fərqləndiklərinə görə 40 əməkdaş baş prokurorun və respublika hərbi prokurorunun əmri ilə həvəsləndirilib. Bundan başqa, Hərbi Prokurorluq əməkdaşlarının iş şəraitinin yaxşılaşdırılması üçün mərkəzi aparatın və ərazi hərbi prokurorluqlarının inzibati binaları əsaslı surətdə yenilən qurulub. Hazırda Respublika hərbi prokurorluğunun yeni 9 mərtəbəli və Qazax hərbi prokurorluğunun inzibati binalarının inşası davam etdirilir. |
