Azərbaycandakı diplomatik missiyası başa çatan İsrail səfiri Artur Lenk ölkəsinə yola düşməyə hazırlaşır. Onun yerinə isə başqa bir diplomat - İsrailin Qazaxıstandakı keçmiş səfiri Mixael Lavon təyin olunub. Bu barədə Artur Lenk jurnalistlərlə vida görüşü zamanı məlumat verib. Onun sözlərinə görə, yeni səfir diplomatik missiyasını yerinə yetirmək üçün bu ilin avqustunda Bakıya gələcək.
Diplomatik fəaliyyəti dövründə ona göstərilən diqqət və qayğıya görə Azərbaycan hökumətinə və xalqına minnətdarlıq ifadə edən Lenk bildirib ki, geridə qalan 4 il ərzində ölkələr arasında qarşılıqlı əlaqələrin genişləndirilməsi sahəsində böyük işlər görülüb. Azərbaycanda yaşamaq qismət olduğu üçün özünü xoşbəxt sayan diplomat burada olduğu zaman özü və ailəsinin çox yüksək qonaqpərvərliyin şahidi olduğunu qeyd edib.
Keçmiş səfir Azərbaycanın İsrail ilə Suriya arasında vasitəçilik etməsi barədə yayılan məlumatlara da münasibət bildirib. Bu haqda, sadəcə, mətbuatdan oxuduğunu deyən diplomat deyib ki, Azərbaycanın İsraillə Suriya arasında aparılan danışıqlarda vasitəçilik edəcəyi barədə informasiyanın haradan qaynaqlandığını bilmir.
"Sözügedən məsələ ilə bağlı heç bir məlumatım yoxdur və bununla bağlı rəsmi bir xəbər almadım. Eyni zamanda, bu informasiyanın haradan qaynaqlandığını da bilmirəm, çünki dediyim kimi, bu barədə məlumatsızam. Ümid edirəm ki, gün gələcək və bizim Suriya ilə danışıqları bərpa etmək imkanımız olacaq. Biz çox ümid edirik ki, nə vaxtsa sülhə nail olacağıq", - deyə diplomat bəyan edib.
Xatırladaq ki, Artur Lenk 4 ildir İsrailin Azərbaycan səfiri vəzifəsində çalışır. Buradakı missiyasını başa vuran səfir İsrail qanunlarına əsasən, ölkəsinə döndükdən sonra 2 il Xarici İşlər Nazirliyində çalışacaq.
|
