Kamerunlu futbolçu Samuel Eto yaxın vaxtlarda İspaniyanın "Barselona" klubundan İtaliyanın "İnter" komandasına keçəcək. Oyunçunun agenti bu işlə bağlı aparılan danışıqların uğurla nəticələndiyini açıqlayıb. O, tərəflərin prinsipial razılıq əldə etdiyini desə də, əlavə şərh verməyib. Afrikanın ən yaxşı futbolçusunun İtaliyaya yollanma variantlarından biri onun isveçli hücumçu Zlatan İbrahimoviçlə dəyişdirilməsidir. İspaniya mətbuatının yazdığına görə, "İnter" Etodan savayı belorus yarımmüdafiəçi Aleksandr Qlebi də icarəyə götürməli və 40 milyon məbləğində pul kompensasiyası almalıdır.