Ötən həftə Bakıda sərbəst, yunan-Roma və qadın güləşi üzrə Qızıl Qran-pri turnirinin final mərhələsi keçirildi. Doğma azarkeşlər önündə mübarizə aparan Azərbaycan pəhləvanları yarışı 20 medalla başa vurdular.
Turnirin sonuncu günü xalça üzərinə çıxan sərbəst güləşçilərimiz 2 qızıl, 2 gümüş, 4 bürünc medal qazanıblar. Namiq Sevdimovla (55 kq) Zəlimxan Hüseynov (60 kq) qızıl, Xaqan Süleymanov (66 kq) və Əli İsayev (120 kq) gümüş, Çamsulvara Çamsulvarayev, Aqil Quliyev (hər ikisi 74 kq), Şərif Şərifov (84 kq) və Xetaq Qazyumov (96 kq) bürünc medal qazanıblar.
Bundan əvvəl isə yunan-Roma güləşçilərimiz 2 qızıl, 1 gümüş, 4 bürünc, qadın güləşçilərimiz isə 1 qızıl, 1 gümüş və 3 bürünc medala sahib olublar. Yunan-Roma üslubunda güləşənlərimizdən Fərid Mansurov (66 kq) və Rafiq Hüseynov (74 kq) qızıl, Vitali Rəhimov (60 kq) bürünc, Pərvin Bayramov (55 kq), Sakit Cəlilov (60 kq), Emin Əhmədov (66 kq) və Denis Mişin (96 kq) bürünc medal qazanıblar.
Qadın güləşçilərimizə gəldikdə, Zümrüd Qurbanhacıyeva (67 kq) qızıl, Yuliya Radkeviç (55 kq) gümüş, Mariya Stadnik (48 kq), Sona Əhmədli (55 kq) və Elvira Mürsəlova (59kq) bürünc medala layiq görülüblər. Hər çəkidə qaliblərə 10 min dollar, finalçılara 5 min dollar, bürünc mükafatçılara isə 2 min dollar mükafat verilib.
|
