Gələn ilin mayında Norveçin paytaxtı Osloda "Eurovision-2010" müsabiqəsinin keçiriləcəyi arena dəqiqləşib. Müsabiqənin rəsmi internet saytının yaydığı xəbərə görə, "Eurovision-2010" mahnı müsabiqəsi Osloda yerləşən "Fornebu Arena"da keçiriləcək. Qeyd olunur ki, "Fornebu Arena" daha çox "Telenor Arena" kimi tanınır. Norveçin "NPK" televiziyası bununla bağlı açıqlama verib.

Xəbərdə qeyd olunur ki, mayın 25-də və 27-də keçiriləcək iki yarımfinal, 29-da keçiriləcək final mərhələsi "Telenor Arena"da keçiriləcək. Müsabiqəni işıqlandırmaq üçün Osloya gələcək media mənsubları üçün də "Telenor Arena"da mətbuat konfranslarının keçirilməsi üçün zal, eləcə də media mənsubları üçün iş otaqları da təşkil olunacaq. Cənubi Avropada ən böyük arena olan "Telenor Arena" Şimali Osloda, Baerumda yerləşir. "Telenor Arena" futbol matçları üçün 15.000, konsertlər üçün isə 23.000 tamaşaçı tutur.

"Eurovision-2010" müsabiqəsinin keçiriləcəyi bu arena cari ilin fevralında istifadəyə verilib. "Spektrum Arena"sı isə daha az tamaşaçı tutduğu üçün yarışmanın keçirilməsi üçün əlverişli olmayıb. Məhz bu səbəbdən də "Spektrum Arena" "Telenor Arena"ya uduzub. Onu da deyək ki, "Spektrum Arena"da artıq bir dəfə möhtəşəm yarışlardan biri keçirilib.