Bəzi klipmeykerlərdən fərqli olaraq rejissor Fuad Əlişov bədii film ekranlaşdırmaq həvəsində deyil. Yaradıcılığını klip çəkilişləri və reklam sifarişləri çərçivəsində məhdudlaşdıran rejissor böyük ekran əsərləri barədə hələ düşünmür. Səbəbini xəbər alanda bunu keyfiyyətə bağladı. Bildirdi ki, bədii film arzularını kiçik və sənədli filmlərlə öldürməsin deyə hələ ki kliplərlə kifayətlənir. Deyir ki, onun tənbəl olduğu deyilsə də, bunun məsələyə heç bir aidiyyəti yoxdur: "Çoxları xarici görünüşümə baxıb tənbəl olduğumu deyir. Lakin mən bir işə başlayanda onun öhdəsindən gəlirəm. Heç bir işim yarımçıq və səviyyəsiz alınmayıb. Əgər bu gün mənə dövlətsəviyyəli böyük ekran əsəri hazırlamaq təklif olunsa, onun ağırlığını çiynimdə daşıya biləcəyimə inanıram. Lakin özəl filmlər çəkməkdən imtina etmişəm. Bu günə qədər bir neçə sənədli və özəl filmlər təklifi almışam. Lakin mən özümü burada görmürəm. Bilirəm ki, sifarişçinin istədiyindən də yüksək səviyyədə ekran işi ortaya qoya bilərəm. Lakin buna baxmayaraq təkliflərdən imtina etmişəm. Mənim üçün hər bir işin səviyyə tutumu yüksək olmalıdır. Lakin təkliflərə yanaşanda onun gələcəyini uğurlu görməmişəm. Bu gün tarixə düşəcək bir-iki film var ki, onlar da dövlətin sifarişi ilə ekranlaşdırılır".
