Klipmeyker Aqil M.Quliyevin növbəti dəfə ailə həyatı qurması ilə bağlı xəbər yayılıb. Deyilənə görə, rejissor uzun fasiələdən sonra subaylığın daşını atmaq qərarına gəlib. Özü ailə qurmağın zamanı gəlib desə də, qərarında qəti olmadığını bildirdi: "Bunun üçün mənə bir neçə ay vaxt lazımdır. Fikirləşib qəti qərara gəlməliyəm. Atdığım addıma görə, sonradan peşman olmaq istəmirəm".
Yaradıcılıqdan söz salan rejissor öncə bildirdi ki, iqtisadi böhran yaranan zaman çəkdiyi kliplərin qiymətini aşağı salmayıb. Hazırda bir sıra reklam sifarişləri üzərində çalışan klipmeyker payız aylarında yaradıcılıq ritmini artıraraq daha böyük işlərə imza atacaq.
Onun daha bir yaradıcılıq işi mini-filmdən ibarətdir. Filmdən söz düşmüşkən, heç də kliplərini mini filmlərdən zəif hesab etmir. Onun fikrincə, bu gün ekranlaşdırılan bəzi filmlər onun klipləri ilə müqayisədə zəifdir. Bunu təfərrüatı ilə danışmaq istəməyən rejissor "xalqın gözü tərəzidir" deyib məsələnin üstündən keçdi.
Eyni zamanda düşünür ki, tamaşaçı filmdən daha çox klip və reklam çarxlarına maraq göstərir: "Bu sahədə işləyən rejissorlar məlumatı yığcam çatdırmağı, izləyicidə maraq oyatmağı və ən əsası geniş tamaşaçı kütləsi üçün maraqlı məhsul hazırlamağı bacarmalıdır. Saatyarımlıq darıxdırıcı bir film çəkməkdənsə, insanların məhəbbətini qazanan beş dəqiqəlik klip ekranlaşdırmaq daha yaxşıdır".
|
