Ermənistan ordusundakı dözülməz vəziyyətə tab gətirməyərək Azərbaycan tərəfinə keçən erməni əsgər Karen Harutunyan artıq Bakıya gətirilib. Karen Harutunyan iyulun 15-i axşam saatlarında Gədəbəy rayonu ərazisində Azərbaycan tərəfinə keçib.
Ermənistan Müdafiə Nazirliyinin 549 saylı əlahiddə motoatıcı alayının əsgəri, 19 yaşlı İrəvan sakini K.Harutunyan ANS-ə müsahibəsində bildirib ki, o, orduda ondan tələb edilən rüşvəti vermədiyi üçün edilən işgəncələrə dözməyib, xidməti yerini tərk etmək qərarına gəlib və beləliklə, sərhədi keçərək Azərbaycan əsgərlərinə təslim olub:
"İndi Ermənistanda vəziyyət olduqca pisdir. Ölkə əhalisi çox acınacaqlı yaşayır. Maddi imkan aşağı səviyyədədir. İş yerləri, demək olar, yoxdur. Bu da vəziyyətin daha da pisləşməsinə şərait yaradır. Xalq indiki rəhbərlik - Serj Sarkisyan və Seyran Ohanyanın rəbərliyi altında yaşamaq istəmir. Orada, yəni İrəvanda hər gün rəhbərlik əleyhinə mitinqlər keçirilir. Mən nə o xalqın nümayəndəsi, nə də o dövlətin əsgəri olmaq istəmirəm. Ermənistandan, oranın vətəndaşlığından imtina edirəm. Mən Azərbaycan rəsmilərindən xahiş edirəm ki, məni 3-cü ölkəyə göndərsinlər".
Bu arada Beynəlxalq Qızıl Xaç Komitəsinin (BQXK) Azərbaycandakı nümayəndələri Azərbaycanda əsirlikdə olan Ermənistan ordusunun əsgərləri Ohan Harutunyan və Gevorq Tomasyana baş çəkiblər. Bu barədə APA-ya BQXK-nın Azərbaycan nümayəndəliyinin mətbuat katibi Gülnaz Quliyeva bildirib. Onun sözlərinə görə, əsirlərin saxlanma şəraitinin monitorinqi keçirilib, onlarla təkbətək söhbət aparılıb. Lakin onlar tərəfindən ailələrinə məktub yazılmayıb. Bu, BQXK tərəfindən erməni əsirlərinə ikinci başçəkmədir.
Qeyd edək ki, Ermənistan Ordusunun əsgərləri - 1991-ci il təvəllüdlü Harutunyan Ohan Vadinagiyeviç və 1991-ci il təvəllüdlü Tomasyan Gevorq Serjikoviç mayın 31-də saat 13.00 radələrində Ermənistan - Azərbaycan qoşunlarının təmas xəttində, Goranboy rayonu ərazisində Azərbaycan tərəfə keçiblər.
Ekspertlərin fikrincə, erməni ordusunda xidmətdən yayınma halları getdikcə kütləviləşir. Ermənistanın hərbi-siyasi rəhbərliyini narahat edən məqam əsgərlərin Azərbaycan tərəfə keçidinin kütləviləşə bilməsidir. Ekspertlər bildirirlər ki, Ermənistanın bu ağır iqtisadi-siyasi vəziyyətində ordunun deqradasiyası prosesi davam edəcək. Bu vəziyyətdə yaxın vaxtlarda Azərbaycan tərəfə əsir düşmə prosesinin davam edəcəyini, hətta kütləviləşəcəyini proqnozlaşdırmaq olar. Erməni tərəfi bunun qarşısını yalnız bir yolla ala bilər: Azərbaycanla sərhəd boyu canlı sipər çəkmək, lakin buna Ermənistanın nə hərbi, nə də iqtisadi qüdrəti yoxdur.
|
