ABŞ Senatının xarici əlaqələr üzrə komitəsində "Nabucco" layihəsi üzrə dinləmələr keçirilib. APA-nın ABŞ bürosunun məlumatına görə, dinləmələri açıq elan edən senator Riçard Luqar bildirib ki, Türkiyədə imzalanmış hökumətlərarası müqavilə bütün dünya üçün bir siqnal oldu ki, layihəyə qoşulan ölkələr qazla manipulyasiya edən dövlətlərin planları ilə barışmayacaqlar.
Riçard Luqar bildirdi ki, Rusiya Avropa bazarında dominantlıq edərək Avropaya, Qafqaza və Orta Asiyaya təsirini gücləndirmək arzusunu açıq nümayiş etdirir. Nüfuzlu senator həmçinin bəyan edib ki, Azərbaycan, Türkiyə, Gürcüstan, Avropa Birliyi və ABŞ "Nabucco" layihəsində uğurlar əldə etmək üçün bütün səylərini davam etdirəcəklər. O qeyd edib ki, İraqın layihədə iştirakı böyük imkanlar açır. Natiq Türkiyədə imzalanma mərasimindən sonra İraqın baş naziri Maliki ilə görüşünü xatırladaraq bildirib ki, rəsmi Bağdad "Nabucco" layihəsinə müsbət yanaşır.
ABŞ dövlət katibinin Avrasiya enerji siyasəti üzrə xüsusi nümayəndəsi Riçard Morninqstar bəyan edib ki, İranın bu layihədə iştirakı Tehran özünün nüvə proqramına tam aydınlıq gətirənə qədər mümkün deyil. O həmçinin bildirib ki, "Nabucco"nun ABŞ-a bilavasitə aidiyyəti olmasa da, bu layihə dünyanın qaz təchizatı sistemində vacib rol oynayır.
|
