Qadın voleybolçulardan ibarət yığma komandamız Hollandiyadadır. Faiq Qarayevin başçılıq etdiyi milli bu ölkədə dünya çempionatının üçüncü seçmə qrup mərhələsində mübarizə aparacaq. Yığmamız dünya çempionatının final mərhələsinə vəsiqə qazanmaq üçün meydan sahiblərindən savayı, Almaniya və Sloveniya kollektivlərinə qarşı uğurla çıxış etməli və qrupda ilk iki yerdən birini tutmalıdır.

Voleybol yığmamız bununla ardıcıl ikinci dəfədir dünya çempionatının seçmə mərhələsində mübarizə aparır. Komandamızın bundan əvvəlki cəhdi uğurla nəticələnmişdisə, rəqib komandaların səviyyəsini nəzərə alsaq, həlledici mərhələyə düşmək perspektivi bu dəfə bir qədər dumanlı görünür: Almaniya və Hollandiya hazırda Avropanın ən güclü kollektivləri sayılır.

Yeri gəlmişkən, yığmamız bir qədər əvvəl Rusiyanın ilk prezidenti Boris Yeltsinin şərəfinə keçirilən turnirdə Hollandiya yığması ilə üz-üzə gəlib. Doğrudur, həmin oyunda rəqib 3:2 hesabı ilə çətin qələbə qazanmışdı. Amma bu dəfə dünya çemponatının finalına vəsiqə verildiyindən oyuna münasibət də fərqli olacaq.

Qadınlardan ibarət voleybol yığmamız son dövrlər qeyri-sabit oyun göstərir. Boris Yeltsinin şərəfinə keçirilən beynəlxalq turnirdə komandamızın altıncı olması buna sübutdur. Bu azmış kimi Hollandiyaya səfər ərəfəsində komandamız ciddi itki ilə üzləşib. Millinin aparıcı üzvlərindən olan Yelena Parxomenko məşq zamanı dizini zədələyib. Odur ki, indi komandanın liderləri Natalya Məmmədova, Oksana Parxomenko, Valeriya Korotenko və yığmanın digər təcrübəli voleybolçularından çox şey asılıdır.

Yığmamız ilk oyununu Almaniya millisinə qarşı keçirəcək. Sonra Hollandiya və Sloveniya komandaları ilə üz-üzə gələcək.