Dünən Bakı İdman Sarayında sərbəst, yunan-Roma və qadın güləşi üzrə Qızıl Qran-pri turnirinin final mərhələsi başlanıb. Qızıl Qran-pri turniri güləş idman növündə dünya və Avropa çempionatlarından sonra ən nüfuzlu beynəlxalq turnir hesab olunur. Turnirdə 30 ölkədən 400-ə qədər güləşçi mübarizə aparır.
Qızıl Qran-pri turniri artıq 4 ildir keçirilir. Üstün cəhəti ondadır ki, yarışda ilk iki mərhələnin yekununda güləşçiyə reytinq balları verilir. Buna görə də yarış Avropa və dünya çempionatlarından sonra güləşdə üçüncü populyar yarış sayılır. Turnirin ümumi mükafat fondu 441 min manatdır. Hər qızıl medala görə idmançıya 10 min, gümüş medala görə 5 min, bürünc medala görə 3 min manat mükafat veriləcək.
Yarışla əlaqədar Beynəlxalq Güləş Federasiyaları Assosiasiyasının (FİLA) prezidenti Rafael Martinetti də ölkəmizdə səfərdədir. Mətbuat konfransı keçirən qonaq müasir dövrdə idmanın peşəkarlaşdığını və yüksək səviyyəli atletlərin hər yarışda iştirakını təmin etmək üçün stimullaşdırıcı vasitə kimi ona pul mükafatı verilməsini vacib saydığını deyib.
Güləşçilərimiz Qızıl Qran-pri turnirinin final mərhələsində ən azı bu il Avropa çempionatında göstərdikləri nəticəni təkrarlamalıdırlar. Amma Avropa çempionatından fərqli olaraq, Qızıl Qran-pri turnirinin final mərhələsinə digər qitələrdən də pəhləvanlar qatılıblar.
Azərbaycan güləşçiləri 31 mart - 5 apreldə Litvanın paytaxtı Vilnüsdə keçirilmiş Avropa çempionatında 5 qızıl, 2 gümüş, 2 bürünc medal qazanıblar. Bu yarış sentyabrda dünya çempionatına yollanacaq Azərbaycan yığma komandalarının heyətini müəyyənləşdirmək baxımından böyük önəm daşıyır.
|
