UEFA Avropa Liqası turnirinin ikinci təsnifat mərhələsinin oyunları keçirilib. Bu yarışda ölkəmizi təmsil edən yeganə komandamız "Qarabağ" səfərdə Norveçin güclü "Rosenborq" klubu ilə heç-heçə oynayaraq sensasiyaya səbəb olub. Dünən keçirilən püşkatmadan sonra "Qarabağ"/ "Rosenborq" klublarının potensial rəqibi məlum olub. Belə ki, bu cütün qalibi "Xonka"(Finlandiya) - "Banqor Siti" (Uels) cütünün qalibi ilə qarşılaşacaq.
Avropanın adlı-sanlı komandalarından sayılan, dəfələrlə Çempionlar Liqası turnirinin qrup mərhələsinin oyunlarında mübarizə aparan "Rosenborq"un öz meydanında "Qarabağ"a qalib gələ bilmədiyi azərbaycanlı futbolsevərlərə sevinc, rəqib komandaya şok yaşadıb.
Tronheymdə keçirilən matçda "Qarabağ" futbolçuları hücuma o qədər də meyil göstərməyiblər. Əslində hücuma meyil göstərməyə imkan da olmayıb. Çünki oyuna fəal başlayan "Rosenborq" məsələni ilk görüşdəcə həll etmək və Bakıda keçiriləcək cavab matçını formallığa çevirməyə çalışıblar. Amma rəqib komandanın bu istəyi alınmayıb. Ardı-arası kəsilməyən hücumlara, 12 künc zərbəsi, qapımıza doğru vurulan 13 dəqiq zərbəyə baxmayaraq, "Rosenborq" Azərbaycan klubuna qalib gələ bilməyib.
Komandanın baş məşqçisi Qurban Qurbanov nəticədən çox razıdır. Baxmayaraq ki, qolsuz bərabərlik "Qarabağ" üçün ideal nəticə sayıla bilməz. Çünki dörd gündən sonra Bakıda keçiriləcək cavab matçında "Rosenborq" kimi səviyyəli Avropa klubunun qələbə qazanaraq növbəti mərhələyə adlayacağına inanmamaq sadəlövhlük olardı.
Cavab matçı iyulun 23-də keçiriləcək. Matç "Qarabağ"ın mənsub olduğu Ağdam şəhərinin ermənilər tərəfindən işğal edildiyi günə təsadüf edir.
|
