Gənc müğənni Nurlan Növrəslinin Novorossiyskdə Gənc İfaçıların VIII Beynəlxalq "Morskoy uzel" ("Dəniz qovşağı") müsabiqəsində iştirak etdiyi və 2-ci yerə layiq görüldüyü barədə məlumat vermişdik. Bu günlərdə səfərini başa vuran və iyulun 16-da doğum gününü qeyd edən Nurlan Növrəsli müsabiqədə iştirakı ilə bağlı bəzi bilgiləri media mənsubları ilə bölüşdü.
Sənətçi sözügedən müsabiqədə "BUTA" mədəniyyət mərkəzinin dəstəyi sayəsində iştirak edib. Onun mahnılarını dinləyən münsiflər heyəti azərbaycanlı sənətçini birinci görmək istəyiblər. Lakin münsiflər kürsüsündə yer alan iki erməni Nurlanın uğuru ilə barışmaq istəməyib.
Müsabiqə turları ərəfəsində müəyyən problemlərlə üz-üzə qalan Nurlan bunun düşünülmüş bir qurğu olduğunu istisna etmir. Deyir ki, müsabiqənin şərtlərinə əsasən, orada iştirakçı ölkələri tərənnüm edən mahnı ifa edilməli idi. Lakin onun qismətinə "Bizdə hər şey yaxşıdı, bəs Yerevanda necə" sözləri yazılmış mahnı düşüb. Şərtlərin əleyhinə çıxan Nurlan Növrəsli vəziyyətin necə olacağını düşünmədən mahnıdan imtina edib. Uzun sürən danışmalardan sonra onun repertuarı dəyişdirilib. Lakin bu və digər səbəblərdən o, layiq olduğu 1-ci yox, 2-ci yeri tutub. Açıqladı ki, münsiflər həmin yeri Ermənistandan olan iştirakçılarla bölüşüblər.
Nurlan Növrəslinin dediyinə görə, münsiflər heyətində Rusiya İncəsənət Akademiyasının akademiki Svyatoslav Belza, bəstəkar, şair Mixail Şabrov, bəstəkar-prodüser Aleksandr Şevçenko, Rusiya xalq artisti Georgi Qaranyan, əməkdar incəsənət xadimi Adam Terasuyan və başqaları qiymətləndiriblər. Müsabiqə zamanı Nurlan Növrəsli "Tolko ya", finalda isə müsabiqə üçün yazılan "Çernoe more" mahnısını səsləndirib. Hər iki mahnının bəstəsi Şahin Növrəsliyə, sözləri isə Ziya Fazilə məxsusdur".
|
