"Azərbaycan prezidenti ilə görüşdə onun iyulun 17-də Moskvada Ermənistan prezidenti ilə görüşə razılığı alınıb". Bu barədə cümə günü Rusiyanın Bakı səfirliyində keçirilən mətbuat konfransında Minsk Qrupu həmsədrləri bildiriblər.
"Görüşün yekunlarına dair heç bir sənədin imzalanması nəzərdə tutulmur", - deyə rusiyalı həmsədr Yuri Merzlyakov bildirib. Habelə o, Rusiya və Ermənistanın Kollektiv Təhlükəsizlik Müqaviləsi Təşkilatı çərçivəsində birgə təlimlərinin də mümkün sülhə mane olmayacağını söyləmişdir:
"Hesab etmirəm ki, Rusiya və Ermənistanın Kollektiv Təhlükəsizlik Müqaviləsi Təşkilatı çərçivəsində birgə təlimləri Azərbaycanda hansısa qorxu yaradır. Heç vaxt belə olmayıb. Ən azı Azərbaycan rəhbərliyi tərəfindən bu cür bəyanatlar səsləndirilməyib".
KTMT çərçivəsində Rusiyanın Ermənistana hərbi yardımlarının Dağlıq Qarabağ münaqişəsinin həllinə və Rusiyanın vasitəçi kimi bu prosesdə iştirakına təsirinin mümkünlüyü haqda sualı cavablandıran Y.Merzlyakov bildirib ki, KTMT ölkələrinin operativ reaksiya qüvvələrinin yaradılmasına dair razılaşması Rusiyanın Ermənistana yardımını yox, terrorçuluqla mübarizəni nəzərdə tutur: "Ona görə də sazişin Ermənistanı gücləndirdiyi barədə nəticə çıxarmaq lazım deyil".
Qarabağ ermənilərinin danışıqlarda iştirakının mümkünlüyü ilə bağlı suala cavabında Yuri Merzlyakov bildirib ki, bu iştirakı dəstəkləyir. Bu zaman o, Qarabağın azərbaycanlı icmasının da iştirakını istisna etməyib.
Sonra həmsədrlər İrəvanda Azərbaycan tərəfin snayperləri cəbhə xəttindən geri çəkmək istəmədiyi barədə verdikləri bəyanatı təsdiq ediblər. "Bəli, biz bunu demişik, Ermənistan və Qarabağ rəhbərliyi bunu etməyə hazırdır, özünüz nəticə çıxarın ki, buna kim hazır deyil", - deyə Merzlyakov ikimənalı fikir bildirib.
Prezident İlham Əliyevin Rusiya televiziyasına müsahibəsini şərh edən Merzlyakov qeyd edib ki, Azərbaycanda bu, "normal" qarşılanıb, lakin Ermənistanda və Qarabağda vəziyyət nisbətən çətindir. "Orada narazı olanlar var və Ermənistan rəhbərliyi üçün bir qədər çətin olacaq", - deyə Merzlyakov bildirib.
Fransalı həmsədr Bernar Fasye qeyd edib ki, hər iki prezident Praqa və Sankt-Peterburq görüşlərində nizamlanma ilə bağlı irəliləyiş əldə olunduğunu etiraf edirlər: "Hər iki prezidentin Moskvada yeni nəticələr əldə etmək əzmində olduğu hiss olunur və biz ümid edirik ki, Moskva görüşündən sonra danışıqlar finiş xəttinə çıxacaq".
Fasye "Təməl prinsiplər"in cari ilin sonuna qədər razılaşdırılacağına, gələn ilin əvvəlində isə sülh yolu ilə nizamlanma üzrə "Təməl prinsiplər"in mahiyyəti üzərində işlərin başlaya biləcəyinə ümid etdiyini bildirib.
Amerikalı həmsədr Metyu Brayza qeyd edib ki, hazırkı danışıqlar daha ciddi səviyyədə aparılır. Həmsədr görüşlərinin çox konstruktiv keçdiyini və prezidentlərin qarşıdakı görüşünün tərəqqiyə səbəb olacağına ümid bəslədiklərini deyiblər. Metyu Brayza danışıqlar prosesinin "yeni və daha ciddi" mərhələdə olduğunu, bu mərhələnin onlara ümid verdiyini söyləyib.
Mətbuat kofransında iştirak edən ATƏT-in fəaliyyətdə olan sədrinin şəxsi nümayəndəsi Ancey Kasprşik qeyd edib ki, son vaxtlar cəbhə xəttində atışmanın intensivliyi və qurbanların sayı azalıb ki, bunu da aparılan danışıqlarla əlaqələndirmək olar.
Dünən Azərbaycan prezidenti İlham Əliyev ATƏT-in Minsk Qrupunun həmsədrlərini və ATƏT-in hazırkı sədrinin xüsusi nümayəndəsi Ancey Kasprşiki qəbul edib. APA-nın xəbərinə görə, görüşdə Ermənistan-Azərbaycan, Dağlıq Qarabağ münaqişəsinin nizama salınması ilə bağlı danışıqların hazırkı vəziyyəti və perspektivlərinə dair fikir mübadiləsi aparılıb.
Bu arada isə ABŞ, Rusiya və Fransa prezidentləri "Böyük səkkizlər"in İtaliyanın Akvil şəhərində keçirilən toplantısında Dağlıq Qarabağ münaqişəsinin həlli prosesi ilə bağlı birgə bəyanatla çıxış ediblər. APA-nın xəbərinə görə, Barak Obama, Dmitri Medvedyev və Nikola Sarkozi həmsədrlərə Azərbaycan və Ermənistan prezidentlərinə baza prinsiplərinə dair son təkliflərin əks olunduğu, 2007-ci il noyabrın 29-da açıqlanmış Madrid təklifləri üzrə yeni versiyanı təqdim etməyi tapşırıb:
"Biz Azərbaycan və Ermənistan prezidentlərini qalan fikir ayrılıqlarını aradan qaldırmağa və hərtərəfli sülh planının əsasını təşkil edəcək baza prinsiplərinin razılaşdırılmasını başa çatdırmağa çağırırıq".
Barak Obama, Dmitri Medvedyev və Nikola Sarkozi əsas prinsiplərin razılaşdırılmasında Azərbaycan və Ermənistan prezidentlərinə dəstək verəcəklərini təsdiqləyiblər.
|
