Son günlər yeni mahnıları ilə repertuarını təzələyən müğənni Könül Kərimova xeyirxah müğənni kimi də tanınmaq istəyir. Onunla söhbətimizdə bir çox məqamlara toxundu, hər birində isə xoşniyyət olduğu ortaya çıxdı. Əvvəlcə bildirdi ki, uzun illər çalışdığı bəstəkar Cabbar Musayevin Röyanın ifasında hit olan "Unutuldum" mahnısı, əslində, onun üçün yazılıbmış. Lakin müğənni hələ heç yanda ifa edilməyən bəstəni eşidəndə Cabbar Musayevdən onu Röyaya təqdim etməyi xahiş edib: "Bəstəkar dostuma dedim ki, bu mahnı sırf Röyanın səsi üçün biçilib. O, "mahnı məşhurlaşanda peşman olmayacaqsan" sualını verdikdə mən əvvəlki mövqeyimdə qaldım. Cabbarın proqnozları düz çıxdı. Mahnı bütün nəsildən olan tamaşaçıların xoşuna gəldi. Amma mən atdığım addıma görə peşman olmadım".
Söhbətinin davamında Könül xanım repertuarından olan "Bu gecə" mahnısının məşhurluğundan da söz açdı. Xatırladaq ki, həmin mahnını türkiyəli sənətçi Gülbən Ərgən ifa edib. Gülbən Ərgən müğənninin daha bir mahnısı - "Sənin olmaya gəldim"i növbəti albomuna daxil etməsi üçün müəlliflərdən halallıq istəyirmiş. Lakin Brilyant xanım həmin mahnını ifa etdikdən sonra Könül Kərimova bu məsələni bağlamağı məsləhət bilib: "Brilyant xanım bu mahnını özünəməxsus şəkildə ifa edib. Çox bəyəndim. Cabbar müəllimlə bu qənaətə gəldik ki, həmin mahnını məhz Brilyant xanıma verək".
Sözünün davamında müğənni yaradıcılıq planlarından söz açdı. Dedi ki, bu günlərdə bəstəkar Nazimin "Zülümkar" adlı mahnısını ifa edib. Tezliklə mahnının efir variantını görməyi arzulayan Könül Kərimova bu niyyətlə rejissor seçimi edib və Gülər həsənlinin adı üzərində dayanıb. Müğənni ən qısa zamanda çəkiliş meydançasına yollanacaq.
Müğənni daha bir xəbəri də bizimlə bölüşdü. Söylədi ki, bu günlərdə avtomobilini təzələyib. Bahalı "Audi" markalı avtomobilə sahib olan müğənni onun məbləğini də açıqladı: "Mən avtomobil həvəskarıyam. Bu sahədə əlim açıqdır. Əgər büdcəm arzuladığım markanı almağa imkan verirsə, bunu edirəm. Bu günlərdə aldığım avtomobilə 130 min manat xərcləmişəm. Köhnə maşınımı satmağım yenisini almaqda mənə bir qədər kömək olub".
|
