Ramiz Quliyev xarici ölkə orkestrləri ilə konsert verəcək
 |
Tarzən MDB ölkələri auditoriyasına üz tutur
Şənbə, 11.07.2009
|
|
Ötən həftələrin birində yaradıcılığının 45 illiyini qeyd edən Azərbaycanın xalq artisti Ramiz Quliyev yeni musiqili proqram ərsəyə gətirir. Tarzən bunun musiqi tarixinə bir töhfə olacağını iddia edir. Hazırlıq prosesinin davam etdiyini deyən musiqiçi paralel olaraq danışıqlar da aparır. Lakin o bunun nədən ibarət olduğunu təfərrüatı ilə açıqlamaq istəmir. Hazır məhsulun təqdimatı ərəfəsində danışmağı üstün tutan Ramiz Quliyev hələlik səfərlərindən söz açdı. Dedi ki, hesabat konsertini təqdim edəndən bir neçə gün sonra ona təklif gəlib:
"Təklifi uzaq ölkədən almışam. Bu bir qədər fərqli səfər olacaq. Yeni konsert proqramı və bir sıra musiqi mərkəzlərində görüşlər nəzərdə tutulur. Lakin mən "yüz ölçüb, min biçmək" prinsipinə əməl edib hələlik danışıqlar prosesini davam etdirirəm. İkitərəfli razılıq əldə olunsa, layihə sentyabrda real həllini tapacaq".
Musiqiçi əlavə etdi ki, onun bir sıra MDB ölkələrində silsilə konsert proqramı gözlənir. Səfər proqramı sentyabr-oktyabr aylarına planlaşdırılıb. Ramiz Quliyev, haqqında danışdığı konsert proqramını səfərdə olacağı ölkənin dövlət orkestrinin müşayiəti ilə səsləndirəcək: "Bu maraqlı təklifdir. Lakin bir qədər zaman tələb edir. Bu səbəbdən layihənin həlli bir qədər gecikir. Çünki həmin ölkələrin orkestr heyəti mənim proqramımı bilmir, mən isə onlarla birlikdə məşq etməmişəm. Bu proses uzun zaman tələb edir. Bu mərhələni başa vurandan sonra uğurlu konsert layihəsinə imza atacağıma ümid edirəm".
|
|
|
Oxşar xəbərlər:
Qazın qiymət artımı narazılıq yaradıb
Qazın qiyməti bahalaşdı: ekspertlər nə deyir?
Aysel Tarkanla duet oxumaq istəyir
Qazın bahalaşması: Tarif Şurasının araşdırması əsassız sayılır
"Min bir gecə"nin daha bir cütlüyü gecə gəzməsində
|
|
|
