Dövlət Dəmir Yolu İdarəsi havaların isti keçməsilə bağlı gücləndirilmiş iş rejiminə keçib. İdarənin mətbuat xidmətinin rəhbəri Nadir Əzməmmədovun sözlərinə görə, idarənin "Yol Təsərrüfatı" istehsalat birliyi artıq bu məsələ ilə bağlı tədbirlərə başlayıb. Birlik dəmir yollarında relslərin arasındakı məsafəni azaldıb. Belə ki, qış aylarında həmin relslərin ara məsafəsi 12,50 metr olduğu halda, havaların isti keçməsilə əlaqədar həmin məsafə 12,47 metrə endirilib. Bu proses isti hava şəraitində dəmir yolu relslərinin genişlənməsinin qarşısını almaq məqsədi daşıyır. Bundan başqa, birliyin əməkdaşları relslər arasındakı quru ot-alaqların da təmizlənməsinə başlayıb. Hazırda birlik ölkə üzrə dəmir yollarına gün ərzində 3 dəfə baxış keçirir.
Ölkə ərazisində 2950,6 kilometr açıq uzunluğu olan baş dəmir yolları var ki, onun istismar uzunluğu 2122 kilometrdir. Dəmir yolunun 60 faizi elektrikləşib, 40 faizi isə teplovoz dartısı ilə hərəkət edir.
|
