Nazirlər Kabinetinin təsdiqlədiyi "Əcnəbilərə və vətəndaşlığı olmayan şəxslərə respublikada müvəqqəti yaşamaq üçün icazənin verilməsi qaydaları" ölkəyə gəlmək istəyənlərə yalnız qüvvəyə mindiyi gündən şamil olunacaq. Miqrantlara Hüquqi Yardım Mərkəzinin rəhbəri Əlövsət Əliyevin sözlərinə görə, artıq miqrasiya siyasəti tənzimlənir. Azərbaycana gələn miqrantlar 3 aydan bir öz ölkələrinə qayıdır, lazım olduqda təkrar gəlirlər. Bu həm də rüsumların daxil olmasına təsir göstərir. Digər tərəfdən, beləliklə də, əmək bazarı tənzimlənəcək. Buna görə də yeni qaydaların tətbiqi müsbət dəyişikliklərə səbəb olacaq.
Əlövsət Əliyev miqrantların yoluxucu xəstəliklər yayma ehtimalına da münasibət bildirir: "Daha çox Rusiyaya işləməyə gedən azərbaycanlı miqrantların yoluxucu xəstəliklər yayma ehtimalı var. Çünki soydaşlarımız ağır şəraitdə çalışır, gigiyenik qaydalara riayət edilməyən yerlərdə qalır, xəstəlik daşıyıcısına çevrilirlər. O ki qaldı əcnəbi miqrantlara, viza ilə gələnlərə yoxlanılma qaydaları tətbiq olunmalıdır. Əcnəbilərin də xəstəlik yayma ehtimalı qalmaqdadır".
|
