Bakının ticarət mərkəzlərində satılan uşaq oyuncaqları insan orqanizmi üçün ciddi təhlükə mənbəyidir. Bu, Standartlaşdırma, Metrologiya və Patent üzrə Dövlət Komitəsinin uşaq oyuncaqlarının idxalı və satışı ilə məşğul olan ticarət şəbəkələrində apardığı monitorinq zamanı müəyyən olunub. Araşdırma paytaxtın Səbayel, Nəsimi və Qaradağ rayonlarında həyata keçirilib.
Çin və Rusiyadan idxal olunmuş oyuncaq nümunələri götürülərək komitənin tərkibində fəaliyyət göstərən Sınaq Sektorunun laboratoriyasında yoxlamadan keçirilib. Məlum olub ki, oyuncaqların tərkibində ağır metalların miqdarı, iyi normadan artıqdır, rəngi davamsız, tikiş xətləri zəifdir. Yoxlama aparılan mağazaların uyğunluq sertifikatı olmamış, məcburi sertifikatlaşdırılan məhsullar sırasında olmasına baxmayaraq normativ sənədləri olmadan satışa çıxarılıb.
Standartlara uyğun olmayan oyuncaqlar Çin istehsalıdır. Bütün hallarda müəssisə rəhbərlərinə iradnamələr təqdim olunub, məhsulların satışını qadağan edən tələbnamələr verilib.
Satışına qadağa qoyulmuş təhlükəli oyuncaqlar aşağıdakılardır: "Tvins" nişanlı yumşaq "siçan" oyuncağı, çantada plastik "şax-şax" oyuncağı, plastik paketdə "şax-şax Babu" oyuncağı, plastik "şıx-şıx", paqremuşka "Toys toy", metal "təyyarə", plastik "oğlan" fiquru, rezin materialdan heyvan təsvirli, səsli oyuncaqlar.
|
