Azərbaycan Milli İstiqlal Partiyası Tarif Şurası tərəfindən iyulun 1-dən əhaliyə satılan qazın qiymətinin qaldırılması ilə bağlı bəyanat verib. Partiyanın mətbuat xidmətindən "Ayna"ya daxil olan məlumata görə, bəyanatda qazın 1000 kubm-nin 47,2 manatdan 100 manata çatdırılması barədə qərar pislənir və iqtisadi-sosial əsaslandırma olmadan qəbul edildiyi qeyd edilir.
Bənzər bəyanatı Aydınlar Partiyası da verib. APA-nın məlumatına görə, Aydınlar Partiyası hesab edir ki, maliyyə böhranının Azərbaycana təsirlərinin artdığı və Azərbaycanın qaz ixracatçısına çevrildiyi bir dövrdə əhaliyə satılan qazın qiymətinin artırılması düzgün deyil: "Belə bir vaxtda əhaliyə satılan qazın qiymətinin 2,1 dəfə artırılması ölkədəki sosial gərginliyin daha da artmasına və yoxsulluq miqyasının daha da genişlənməsinə səbəb olacaq. Azərbaycan neft-qaz ölkəsi olduğundan vətəndaşlar bu enerji növlərindən daha ucuz qiymətə faydalanmaq hüququna sahib olmalıdır. Rusiya, İran, Qazaxıstan və Türkmənistanda olduğu kimi Azərbaycanda da enerji daşıyıcıları vətəndaşlar üçün əlçatan olmalıdır".
Partiya, hökuməti Tarif Şurasının qərarını ləğv etməyə çağırır.
|
