Azərbaycan futbolunda daha bir qalmaqal başlayır. Mart ayında qeyri-müəyyən müddətə hakimlikdən qovulan FİFA referisi Babək Quliyev mətbuat konfransı keçirərək üzləşdiyi hadisə ilə bağlı maraqlı açıqlamalar verdi.

Əvvəlcə AFFA Hakimlər Komitəsinin sədri Xaqani Məmmədovdan şikayət etdi və ondan "Qarabağ" - "Bakı" matçı ilə bağlı sifariş aldığını bildirdi: "Xaqani Məmmədov mənə dedi ki, bu, "Qarabağ"ın son şansıdır. "Bakı" ilə oyunda onlara kömək etməlisən, Ağdam komandası qalib gəlməlidir. Lakin bununla razılaşmadım. Xaqani Məmmədovdan dərhal sonra Peşəkar Futbol Liqasının prezidenti Ramin Musayev məni otağa çağırıb soruşdu: "Hazırsanmı? Cavabında dedim ki, hazıram".

Babək Quliyevin sözlərinə görə, "Bakı"-"Qarabağ" (2:0) matçından 3 gün sonra, yəni martın 10-da Musayevlə yenidən görüşüb. Görüş zamanı Ramin Musayev AFFA prezidenti Rövnəq Abdullayevin həmin matçı idarə etmiş hakimlərdən narazı qaldığını və onları cəzalandırmasını tapşırdığını bildirib: "Ramin Musayev mənə vəziyyəti başa saldı və söylədi ki, sən hakimlikdən uzaqlaşdırılmalısan".

Babək Quliyev vurğuladı ki, Hakimlər Komitəsinin sədri Xaqani Məmmədov ondan rüşvət istəyib: "Peşəkar Futbol Liqası birinci dövrənin ən yaxşı hakimini müəyyənləşdirərkən Xaqani məndən rüşvət istədi. Dedi, 2000 manat ver, Anar Niyazovu yox, səni ən yaxşı hakim seçək. Mən də 1500 manat verib birinci dövrənin ən yaxşı hakimi oldum". 35 yaşlı referi aclıq aksiyasına başlayacağını istisna etməyib: "Bir həftədən sonra yenidən mətbuat konfransı keçirəcəyəm. Dövlət başçısı İlham Əliyevə müraciət ünvanlayacağam. Əminəm ki, prezident bundan xəbər tutduqdan sonra haqq-ədalət yerini tutacaq. Əgər işlər müsbət həllini tapmasa, aclıq aksiyası keçirəcəyəm".