İyulun 3-dən 18-dək İsveçrədə 43-cü "Montre Caz Festivalı" keçiriləcək. Müsabiqənin rəsmi internet saytının yazdığına görə, beynəlxalq Montre Caz Festivalında Azərbaycan da təmsil olunacaq. Festivalda Azərbaycan caz musiqiçiləri həm festival çərçivəsində təşkil olunacaq konsertlərdə, həm də müsabiqədə iştirak edəcəklər. Bu günlər ərzində Salman Qəmbərov və onun qrupu, Emil İbrahim və onun qrupu, eləcə də Amerikada yaşayan azərbaycanlı caz ifaçısı Əzizə Mustafazadənin konsertləri keçiriləcək. Azərbaycanlı cazmen İsfar Sarabski isə festival çərçivəsində keçiriləcək müsabiqədə Azərbaycanı təmsil edəcək.
Saytın xəbərində qeyd olunur ki, Salman Qəmbərov və Emil İbrahimin konsertlərində eyni zamanda master-klassın keçirilməsi nəzərdə tutulur. Xatırladaq ki, Azərbaycan sözügedən festivalda ikinci dəfədir təmsil olunur. Ötənilki festivalda Azərbaycanı təmsil edən Şahin Növrəsli müsabiqənin ikinci yerinə layiq görülmüşdü.
|
