Xalq artisti Yalçın Rzazadənin Türkiyədə ürəyindən əməliyyat ediləcəyi barədə məlumat gerçəkləndi. Bir müddət əvvəl əməliyyatın Bakıda aparılacağını deyən müğənni bu işdə yaxın dostlarının ona həm mənəvi, həm də maddi yardım göstərəcəyini bildirmişdi.
Ötən gün xəbər tutduq ki, sənətçini Türkiyəyə aparıblar. Onun ailəsi ilə söhbətdən öyrəndik ki, Yalçın müəllimin səhhəti pisləşməyib. Sadəcə, əməliyyatın İstanbulda keçirilməsi məsləhət olunub və o, "Acıbadem" klinikasına yerləşdirilib.
Ailə üzvlərinin bildirdiyinə görə, aparılacaq ağır əməliyyat gələn həftəyə planlaşdırılıb. Telefon bağlantısı zamanı Yalçın müəllim hazırda əməliyyatdan əvvəl tələb olunan prosedurlardan keçdiyini bildirib. Sənətçi əməliyyatın uğurla bitəcəyinə inanır. Bildirib ki, əməliyyatı həkim Təyyar Sarıoğlu həyata keçirəcək.
Klinikadakı tibbi vəziyyətin ürəkaçan olduğunu deyən Yalçın Rzazadə bunu müşahidələrinə əsaslanaraq söyləyib. Yalçın müəllim dostlarının onunla olduğunu və tələb olunan vəsaitin onlar tərəfindən ödəniləcəyini söyləyib. Ailə üzvləri bildirdilər ki, Yalçın müəllim onların klinikaya gəlməsinin lüzum olmadığını deyib. Heç kimi əziyyətə salmaq istəməyərək telefon bağlantısı ilə onları məlumatlandıracağını söylədi. Müğənni eyni zamanda deyib ki, tezliklə vətənə qayıdaraq ondan nigaran qalan insanları sevindirəcək.
|
