Xalq artisti İlhamə Quliyeva sözləri Cəlal Qurbanova, musiqisi Gövhər Həsənzadəyə məxsus "Sevgi dünyamız" adlı mahnıya klip çəkdirib. Çəkilişləri rejissor Nail Naiboğlunun rəhbərlik etdiyi heyət aparıb. Pavilyonda lentə alınan ekran işində İlhamə xanım xeyirxah pəri obrazını canlandırıb. Rejissor Nail Naiboğlunun sözlərinə görə, klip "Uşaq ili"nə həsr olunub. Bu məqsədlə də İlhamə xanımın klipdə tərəf-müqabili rolunda uşaqlar çıxış ediblər.
İlhamə xanım öz növbəsində bildirdi ki, hazır ekran işi tamaşaçılara onun avqustda gözlənilən doğum günündə təqdim ediləcək.
Bir müddət öncə İlhamə xanım sözügedən klipi Aqil M.Quliyevin ekranlaşdıracağını bildirmişdi. Lakin bəlli olmayan səbəblərdən bu, Nail Naiboğluna həvalə edildi. Rejissorun sözlərinə görə, "Sevgi dünyamız" İlhamə xanım üçün ekranlaşdırdığı 4-cü klipi hesab olunur. Bu mahnıya ekran həyatı vermək üçün bir neçə rejissor maraq göstərsə də, İlhamə xanım sözügedən rejissorun adı üzərində dayanıb. Tərəflərin əməkdaşlığının növbəti aylarda da davam etdiriləcəyi bildirilir.
Söhbət zamanı bəlli oldu ki, Nail bəy daha bir sənətçinin klipinə rejissorluq edib. Milli filmlərimizə böyük maraq göstərən gənc müğənni Lalə Məmmədova yenicə çəkilən klipini bunlardan birinin üzərində qurub. Lakin nə Lalə xanım, nə də ki klipin rejissoru hansı filmin kadrlarından bəhrələndiklərini əvvəlcədən söyləmək istəmədilər. Öyrənə bildik ki, ekran həyatı verilən mahnının sözləri Xanım İsmayılqızının, musiqisi Aygün Səmədzadənin olan "Ömrümüzün ilk sevgisi"dir.
Lalə Məmmədovanın məlumatına görə, ekran işi saf sevgi üzərində qurulub. Rejissorun işinə hər hansı bir müdaxilə etməyən Lalə xanım mövqeyini sonda bildirəcəyini deyir. Klipin rejissoru isə hesab edir ki, onun əməyinin məhsulu milli klip bazarında birincilərdən olacaq.
|
