"Eurovision-2009"un 3-cüsü olan Aysel Teymurzadənin turnesi davam edir. Bu həftənin çərşənbə axşamı "Məzun günü" ilə bağlı tədbirlərdə iştirak edən gənc sənətçi səhəri gün Türkiyəyə yola düşüb. O bir müddət əvvəl qonşu ölkənin "TRT" dövlət telekanalından aldığı təklifi dəyərləndirmək üçün səfərə çıxıb. Layihəyə başlamazdan əvvəl Türkiyənin məşhur otellərindən birində onun mətbuat konfransı keçirilib. Türk mətbuatının yazdığına görə, Aysel medianı maraqlandıran sualları cavablandırmaq üçün ilk öncə özü haqqında geniş məlumat verib.
Müğənni 4 yaşından mahnı oxumağa başladığını və kiçik yaşlarından musiqi təhsili aldığını bildirib. O, türkiyəli KİV mənsublarına "Yeni ulduz" müsabiqəsində oxuduğundan da danışıb. O, sənət həyatının "Eurovision-2" yarışmasından sonra dəyişdiyini bildirib. Müsabiqədən sonra ölkə başçısının xanımı ilə görüşdüyündən danışan Aysel Teymurzadə Azərbaycana bu sevinci yaşatdığı üçün özünü xoşbəxt hiss etdiyini vurğulayıb.
Söhbətin davamında Türkiyədə ilk dəfə səfərdə olduğunu vurğulayan həmyerlimiz bəyəndiyi sənətçilərin adlarını çəkib. Onun siyahısında Tarkan, Kənan Doğulu, Rafet El Roman, Ebru Gündeş adları olub. Dünya musiqiçiləri sırasında isə o, Maykl Cekson, Uitni Hyüston, Meray Kerri və Beyonsu dinlədiyini söyləyib.
Türkiyə ilə bağlı arzularından söz açan Aysel Tarkanla duet oxumağı arzulayıb. Xatırladaq ki, "Eurovision" başa çatandan bir neçə gün sonra Tarkanın Türkiyədə konserti təşkil olunmuşdu və o, səhnəni Aysellə paylaşmaq istədiyini bildirmişdi. Lakin həmin tarixdə Ayselin əvvəlcədən planlaşdırılmış səfəri olduğundan onların birgə çıxışı həllini tapmamışdı. Aysel əməkdaşlığın həyata keçmə istəyini dilə gətirərək Tarkanın da bu arzuda olduğuna inandığını söyləyib. "TRT" ilə layihəsinə tezliklə start veriləcəyini deyən Aysel bu məqsədlə Türkiyəyə sıx səfərlərinin olacağını bildirib.
|
