Aprelin 30-da Azərbaycan Dövlət Neft Akademiyasında (ADNA) terror aktı törədən Fərda Qədirov qanlı əməlini öncə metroda reallaşdırmaq fikrində olub. Lakin metropolitendəki ciddi nəzarət onu fikrini dəyişməyə vadar edib. Bu barədə dünən keçirdiyi mətbuat konfransında Bakı Metropoliteninin rəisi Tağı Əhmədov məlumat verib.
ADNA-ya silahlı basqın edən Fərda Qədirovun törətdiyi cinayət hadisəsinin izinin Bakı metrosunun kameralarından tapıldığını deyən metropoliten rəisinin sözlərinə görə, onun neçə dəfə metroya girdiyi və nəyə cəhd etdiyi kameralarda öz əksini tapıb. "Fərda Qədirov, çox güman ki, metroda terror aktı törətmək istəyində olub. Lakin metroda terror törədə bilməyəcəyini başa düşüb və bu fikrindən daşınıb", - deyə Tağı Əhmədov bildirib.
Fərda Qədirovun ADNA-da yaşanan olaydan əvvəlki iki gün ərzində metrodan istifadə etmədiyini qeyd edən rəisin bildirdiyinə əsasən, hadisədən sonra cinayətkarın cibindən tapılan metro kartı vasitəsilə onun hansı stansiyaya girib-çıxdığı məlum olub. Lakin həmin stansiyaların adını açıqlamayıb.
Rəis deyib ki, Bakı Metropolitenində təhlükəsizlik yüksək səviyyədə qorunur. Vaqonlarda təhlükəsizliyin təmini və nəzarəti gücləndirmək üçün iyulun 1-dən etibarən 16 yeni ştat açılıb. Metropolitenin hər bir nöqtəsi videokameralarla izlənilir. Yalnız vaqonlarda videokameralar yerləşdirilməyib. Təzə yaradılan ştatlar üzrə yeni işə götürülən əməkdaşlar vaqonlarda nəzarəti həyata keçirəcəklər.
Metropoliten rəisi sözlərinə əlavə edib ki, gələcəkdə vaqonlarda da xüsusi videokameralar quraşdırılacaq və onların vasitəsilə içəridəki vəziyyəti tam müşahidə etmək mümkün olacaq. Əvvəllər metroda videokameralarla çəkilişlər 10 gün müddətində saxlanılırdısa, bundan sonra həmin çəkilişlər arxivləşdiriləcək. Metroda baş verə biləcək bütün hadisələrin kim tərəfindən və necə törədildiyini bu yeni sistem vasitəsilə müəyyənləşdirmək mümkün olacaq.
Tağı Əhmədov hesab edir ki, Neft Akademiyasında yaşanan faciəli hadisə metronun hansısa stansiyasında da baş verə bilərdi, çünki metroda həmişə qələbəlik olur: "Ona görə də cinayətkar metrodan bir neçə dəfə istifadə edib, görüb ki, planlaşdırdığı cinayəti metroda törətmək mümkün olmayacaq. İstər metroda polisin sayıqlığı, istərsə də kameraların olması səbəbindən öz planlarını başqa səmtə yönəldib və belə bir qanlı olayı törədib".
Metropoliten rəisi təhlükəsizliyin təmin olunmasını asan məsələ saymır. Onun sözlərinə görə, stansiyalarda polis qüvvəsi çox olsa da, gündəlik metrodan istifadə edən 750 min sərnişinə nəzarət qeyri-mümkündür. Bu baxımdan belə hesab edir ki, son anda yenə də sərnişinlər özləri bir-birlərinə nəzarət etməlidirlər.
Tağı Əhmədov metropolitenlə bağlı digər təfsilatlara da aydınlıq gətirib. Stansiyaların giriş-çıxışlarında yerləşən ticarət obyektlərinin fəaliyyətinə toxunan rəis onların bağlanmayacağını bildirib. Onun sözlərinə görə, həmin ticarət obyektlərinin fəaliyyətinə, sadəcə, metroda gediş haqqı bahalaşdığı zaman son qoyula bilər. Yəni metroda gediş haqqı qaldırılmayanadək giriş-çıxışlardakı ticarət obyektləri yığışdırılmayacaq: "17 ildir metroda gedişin qiyməti cəmi 5 qəpikdir. Bu da metropolitenin heç bir xərcini ödəmir. Həmin səbəbdən də metropoliten rəhbərliyi keçidlərdəki fərdi ticarət obyektlərini oralardan yığışdırmaq fikrində deyil. Metropoliten hər ay öz ərazisindəki obyektlərdən 60 min manat gəlir götürür. Eyni zamanda, ticarət obyektləri sərnişinlərin gediş-gəlişinə heç bir əngəl törətmir".
|
