Gəncənin 6 saylı orta məktəbinin bir neçə müəllimi iddia edir ki, bu təhsil müəssisəsinin direktoru dərs saatlarını onlara pulla satır, bu vəziyyətə etiraz edənlərsə Təhsil İdarəsi tərəfindən töhmət alır. Həmin məktəbdə 24 ildir müəlliməlik təcrübəsi olan İradə Qədimova iddia edir ki, mütəmadi rüşvət verməkdən təngə gəlib: "Dərsin haqqı var, onu versəm, direktor mənə dərs saatı verər. Tək qadınam hardan alım ona haqq verim ki, mənə dərs versin".
Məktəbin digər bir müəlliməsi Məhəbbət Tapdıqova isə deyir ki, dərs saatları ilə yanaşı, direktor Vəfa Abbasova ondan "maarif"ə pul keçirmək üçün hər ay 10 manat pul ödəməsini tələb edir: "Direktor Vəfa Abbasovaya 100 dollar rüşvət verdikdən sonra o mənə 6 saat dərs vermişdi. İndi pul vermirəm deyə mənə dərs saatı vermir. Hələ məni təhqir də edir. Ali təhsilli ibtidai sinif müəlliməsiyəm, mənə dedi ki, sənin verdiyin pulu "maarif müdiri"nə, inspektorlara verirəm. Məktəbdə hamıdan alır, elə müəllim ola bilməz ki, əlini Qurana basa ki, mən pul vermirəm, amma qorxurlar. Tələbimiz budur ki, bu direktor barədə bir ölçü götürülsün və bütün direktorlara dərs olsun".
Direktorlarının onlardan rüşvət tələb etməsindən narazı olan müəllimlər Təhsil Nazirliyinə, Şəhər Prokurorluğuna və Respublika Prokurorluğu yanında Baş Korrupsiya ilə Mübarizə İdarəsinə şikayət ediblər. Deyirlər ki, onların məktəbin direktoru Vəfa Abbasovadan şikayətlərinə baxılmır, əksinə, təhsil idarəsi onlara töhmət verir.
Məsələyə münasibət bildirən 6 saylı orta məktəbin direktoru Vəfa Abbasova deyir ki, həmin müəllimələr peşəkar deyillər, danışdıqları isə böhtandır.
"Təhsil İdarəsi də, Bakıdan gələn komissiya da araşdırmalar aparıb, onların şikayətləri əsassızdır. Dərs yoxdur, ona görə də onlar qərəzli mövqe tutaraq böhtan atırlar. Özlərinin də iş fəaliyyəti araşdırılıb, bir neçəsi peşəkar olmadığına görə töhmət alıb".
Gəncə şəhər Təhsil İdarəsinin rəis müavini İsmayıl İsmayılov 6 nömrəli orta məktəbin müəllimləri və direktor arasında olan konflikti dərs saatlarının az olması ilə əlaqələndirir. O deyir ki, həmin məktəb üzrə cəmi 60 dərs saatı, 21 ibtidai sinif müəlliməsi var. Digər ittihamlar isə Respublika Prokurorluğu yanında Baş Korrupsiya ilə Mübarizə İdarəsi tərəfindən hələ araşdırılır.
Gəncədə digər təhsil müəssisələrindən də rüşvət sədası gəlir. İşlədiyi məktəbin və öz adının çəkilməsini istəməyən müəllimə deyir ki, onlardan hər ay pul tələb olunur.
"Aprel ayında müəllimlərin əməkhaqlarına 15-20 manat mükafat yazıldı, sonra isə dedilər kimə ki 20 manatdan çox pul yazılıb üstünü də düzəldin gətirin 30 manat verin. Nəyə görə dövlət tərəfindən verilən hədiyyə əlimizdən alınır?"
Hər iki təhsil müəssisəsinin müəllimləri Təhsil Nazirliyinə müraciət ediblər və pozulmuş hesab etdikləri hüquqlarının bərpa olunacağını gözləyirlər.
|
